ابتي

- احب اولا ان اشكر كل احبتي في الله الذين ارسولوا لي التعازي علي المدونه و علي التليفون .. احبكم في الله و كلماتكم قوتني و اسال الله الا تنسوا ابي من صالح دعائكم و اشكر اخي محمد الخشاب علي العمره التي اهداها لابي و بالتاكيد تعجز الكلمات عن شكرك و اسال الله ان يجازيك خير الجزاء من واسع كرمه و فضله ..

يعني ايه بابا مات ....

بابا مات يعني فرد من بيتك مدفون في قير تحت الارض في ظلمات .

بابا مات يعني لما تبقي فرحان بنجاحك و لا بزواجك و لا بولادك.

مش هتلاقيه جمبك يقولك "مبروك يا حبيب قلبي" زي ما كان بيقول .

بابا مات يعني لما تجيب عيال احفاده مش هيشيلهم و يحضنهم و يحبهم ولا حتي هيعرف اساميهم ايه.

بابا مات يعني يوم فرحي لما يقولوا من وكيلها مش هيبقي بابا , وكلهم بعده سواء .

بابا مات يعني طول ما انت قاعد في البيت مستنيه يفتح الباب و يدخل بقي لانه اتاخر قوي.

بابا مات يعني احد اسباب وجودك في الدنيا مدفون تحت الارض.

بالله

كل من قرا هذه الكلمات .. يستشعر معني الاب في حياته ..
باباك بيحبك قوي و انت بتحيه قوي قوي ..
متضيعش ولا لحظه في الحياه القصيره دي في زعل
ولا خلاف مع باباك او مع اي حد في الدنيا ...
لان الموت بيجي بسرعه قوي
و فجاه قوي و مبيحسش بيه الا اللي يفقد ابوه او امه ...

تحديث

احبتي في الله ..
اسال الله ان يكرمكم جميعا و يحفظ لكم احبتكم ..

ردا علي اخي خبيب و اخي عبد الرحمن .. اعزهما الله بالاسلام..
في باقي لخاطره بابا مات ...
بابا مات .. يعني ربنا نفذ قدره فيه اللي محدد له اصلا من وهوه في بطن والدته ..
بابا مات .. يعني اصبح اعتمادنا الاوحد علي الواحد القدير الرحيم.. اعتمادا كليا
بابا مات .. يعني اصبح بين يدي الرحمن الذي هو ارحم بنا من امهاتنا
بابا مات .. مش يعني ربنا لا قدر الله ظلمنا او ظلمه .. استغفر الله و لكن يعني ينظر الينا هل صبرنا علي فقدان عزيز .. فيمنحنا الجنه جزاء .. ام جزعنا
بابا مات .. يعني (( ان شيئا ارتضاه الله لي .. احب الي مما ارتضيه انا لنفسي))
و اخر كلامي ان الحمد لله رب العالمين