مبدا الاستمتاع

" علي فكره الحصان ده مش بهديه لاي حد لان الحصان المنطلق عندي له معاني كبيييييييييره جدا ..

من الاخر بهديه لكل انصار مبدا الاستمتاع"

مبدا الاستمتاع انا الفته من حوالي سنتين كده ...

المعطيات ........
يقوم مبدا الاستمتاع علي : الاستمتاع بكل ما يحيط بك او يحدث لك او تلتقي بهم.
مبدا يتعلق ب : البيئه المحيطه بك , الاحداث التي تمر عليك , و الاشخاص التي تلتقي بهم .
مبدا ينبع من : نفسك .

طيب المساله بقي : ههههههههههههه

تفاصيل المبدا ........
فكره المبدا بسيطه جدا ..

هعمل مقارنه و انتم اللي هتحكموا

" في حاله عدم تطبيق مبدا الاستمتاع " : شوف اللي بيحصل

- تصحي الصبح : تقول ياه نفس اللي بيحصل كل يوم .. اقوم اتوضي و اصلي و البس عشان اروح احضر محاضرات او اروح امضي في الشغل اوف,
- تنزل الشغل اوف تركب مواصله زحمه جدا او تضحي و تركب تاكسي يا ستار و الجو حر .. ياله الحمد لله يا رب و ايه الزحمه اللي في الشوارع و تروح الجامعه او الشغل متاخر .
- يكون الدكتور قفل الباب اوووف او المدير قعد يزعق و اداك كلمتين ده اذا مكنش شطب عليك انك مجيتش لا و ايه هتدخل تشتغل و انت مالكش ذنب في التاخير.
- بعد ما تخلص المحاضره بتاعه الدكتور اللي ما بيجبش الكلام اللي بيقوله في الامتحان او تخلص نفس الشغل اللي بتعملله كل يوم و تستحمل قرف المدير تقوم رايح علي جمعيتك مثلا.
- تروح الجمعيه تلاقي العيال عمالين يتخانقوا و اللي عايز يشتهر و اللي عايز يتقال اسمه و هكذا اوف العالم دي مخنقه قوي.
- تروح تلاقي مامتك عامله طبيخ زي بتاع امبارح .
- تنام شويه و تصحي تتفرج علي شويه بلاهات مقرفه في التلفزيون و تتخانق مع اخواتك عشان تقعد علي النت شويه و بعدين تنام عشان تصحي علي نفس اللي عملته انهرده.

" بتطبيق مبدا الاستمتاع " :

- تصحي الصبح و تستعيذ بالله من الشيطان الرجيم و تبتسم لليوم الجديد و تنوي طاعه ربنا و الاستمتاع بالحلال تتوضي و تصلي و يدعي ربنا انه يكون يوم كله بركه و رضا و تميز و غير الايام اللي فاتت و تدعي انه يكون يوم تحقق فيه كل اللي بتتمناه.
- تكون مجهز اصلا شويه حاجات عايز تعملها و هتخدمك في هدفك الكبير اللي انت وضعته للمرحله الحاليه في حياتك .
- تنزل الشغل او تروح المحاضره طبعا قبل معادك بشويه و بجد " اعملها و ادعيلي" ابتسم و انت نازل علي السلم بتاع بتكم , و متركبش الاسانسير .. مبحبوش :( , المهم و تتنفس نفس عميق و استقبل اليوم بفرحه .
- تنزل الشارع هتلاقي زحمه , اعذرهم هما كمان عندهم شغل , لا و مسؤوليات اكيد اكتر مني و منك و اركب معاهم , و اقوم و قعد الست الكبيره لانها ممكن في يوم تبقي امك او زوجتك او بنتك و غيرك يعملها زي ما انت عملت و ابتسم ليها , و افرح انك لاقيت مواصله تركبها و لو حسيت انك مخنوق قوي قوي غمض عنيك و احلم انك في اجمل مكان في الدنيا و احمد ربنا علي نعمه الخيال.
- هتروح الشغل في ميعادك لانك منظم او هتدخل المحاضره قبل الدكتور لانك بتحب المحاضره حتي لو مكنتش الكليه اللي نفسك فيها , خلاص انا ناوي اني اكون متميز و المتميز بيحب كل اللي بيعمله ,
- هتبدع في شغلك لانك شايف انك متميز زملائك هيحبوك لانك بتساعدهم بحب , و في كل ده انت مستمتع باللي بتعمله , زملائك في الكليه هيحبوك لانك متميز و بتساعدهم و عامل مجموعه و بتشرحلهم الماده الصعبه عليهم .
- بعد ما تخلص هتروح الجمعيه .. هتلاقي شويه مشاكل و هتحاول انت تحلها و تديهم امل و تذكرهم ان كل اللي بيعملوه لوجه الله سبحانه و تعالي و يلتفوا حواليك و يحبوك و تنجز معاهم الشغل اللي المفروض انهم ينجزوه بس متعطل بسبب المشاكل .
- هتروح البيت بقي , خد معاك اكل ديليفري – هههههههه – احمد ربنا علي الاكل اللي مامتك عاملاه و اشكرها عليه و كل باستمتاع .

بالنهايه اذا طبقت مبدا الاستمتاع يجب الا تقوم باي عمل غصب عنك – احم احم الا اذا كان اوامر عليا – و دايما حتي لو في حاجه فرضت عليك ان تفعلها فحاول بكل الطرق ان تخلق فيها سبب يجعلك تستمتع به و ستجد ان شاء الله .

ها من انصار مبدا الاستمتاع .... في انتظار المؤيدين و المعارضين و اضافات الجميع:)

غاده